गोष्ट तशी रीसेंट आहे
आभाळाकडे निघालेले ढग
चुकूनंच चुकले वाट
मिडीया बिडीया
वेधशाळा बिधशाळा
सगळ्यांनीच चर्चेचा घातला मग घाट
कुणीतरी म्हणे मग
मोठ्ठा यज्ञ केला
मंत्र-बिंत्र म्हणून देवाकडंच
तक्रारअर्ज दाखल केला..
मिसिंगची कंप्लेंट
जेव्हा दाखल केली त्यांनी
देव म्हणे पाठवला तर बरोबर होता
काहीतरी घोळ घातलाय कुरियरवाल्यांनी
मी म्हणालो देवाला
चोरला तर नसेल ना कोणीतरी
देव म्हणे, देव तारी त्याला कोण चोरी
आमच्या तोंडचं पार पळालंय बघ पाणी
अशी कशी तू बरोबर पाठवूनंही दिली त्यानं हुलकावणी?
चेक कर की एकदा, पत्ता लिहायला तर नाही चुकलास?
देव म्हणे बास का, एवढाच का तुझा माझ्यावर विश्वास?
मी: तसं नाही रे पण एकदा क्रॉसचेक तर करु
देव: ठिके बाबा, पत्ता सांगायला सुरुवात करु?
पत्ता:
आहे जिथे काळजी, श्रद्धा आपुलकी
दुसऱ्याबद्दल प्रेम आणि खूप सारी माणूसकी
जिथे बोटभरही स्वार्थ नाही
तिथ बरसणं तुझं व्यर्थ नाही
थकली गात्र जिथं
बरस तू जाऊन तिथं
बरस येऊ दे आता पावसाळा
संपव काहीली भिजव आसमंत सगळा..
मी: चं च्च च्च.. पाऊस नाही ना कुरीयरवाले नाही..
पत्ता चुकला तुझाच सगळा...
म्हणूनंच येऊन दाटला बघ पाऊस
माझ्या बळीराजाच्या डोळा.. बळीराजाच्या गळा
के पी आर
