आय वॉना बी यूअर अंडरवेअर

नवा ड्रेस..
चकचकीत कॅरीबॅगेतून काढून
चढवला मी अंगावर..
केसावरुन जेलचा हात फिरवत
पाहिलं आरश्यात..
नव्या कपड्याच्या स्पर्शानं सुखावलो
हसलो स्वतःशीच..
कानात ईयर फोन सारत
बाईकला कीक मारली..
ब्रायन अ‍ॅडम्सचे शब्द कानावर पडण्याआधी
स्पीड वाढवला..
पुढच्याच चौकात.. लाल दिवा..
आईचा घो.. गिअर बदलत
ब्रेक मारला कर्रकचून..
चौकातल्या एका कोपऱ्यात
जीर्ण, कळकट..
शाल सर्दृश कापड गुंडाळून
बसलेला म्हातारा..
कोरडा पावाचा तुकडा खाणारी चिमुकली
भांडणारे बहिण भाऊ.. भावंडंच असावी
तोंड हात पाय सगळं तडकलेलं..
डिसेंबर महिना.. बोचरा वारा
त्याच्या शर्टची सगळीच बटनं तुटलेली..
बघता बघता सिग्नल सुटला..
मागच्या गाड्यांचे हॉर्न्स..
समोर दोन नागवी पोरं..आणि
कानात ब्रायन अ‍ॅडम्स,
"आय वॉना बी यूअर अंडरवेअर"...

के.पी. आर