क्षणात सारे बदलले

एकल्या त्या रातीला श्वास तुझा जाणवतो
रित्या रित्या कुशीलाही स्पर्श असा खुणावतो
उरात अडकल्या श्वासांची माळ आता तुटली
दूर थकल्या चंद्रकोरीनं पापणीही मिटली
क्षितीजावरचं चांदणं रात सारी भरकटले
एकाच त्या क्षणात बघ सारे बदलले

पोरका घरादाराचा कानाकोपरा
साद घालतो तुला काळजाचा आवाज कापरा
वेगळी तुझी वाट वेगळाच प्रवास आता
मिट्ट काळोखाला मिठी उजेडाला भीता भीता
आठवणींच्या आभाळात मेघ आसवांचे दाटले
एकाच त्या क्षणात बघ सारे बदलले

अर्ध्यावरती सोडलास हात
मोडला असा डाव..
अनोळखी मलाच आता माझा गाव
सारं सारं मागे ठेऊन तू दिशा बदलली
ध्यानी मनी नसताना उषा अशी काळवंडली...
दिव्याचे वातीशी नाते कसे गं तुटले
एकाच त्या क्षणात बघ सारे बदलले

घट्ट पकडायची धडपड केविलवाणी
विरणारे श्वास अन रंग बदलले रंगांनी
उमजेना मनास आता हे नियतीचे खेळ कुठले
एकाच त्या क्षणात बघ सारे बदलले.. सारे कसे बदलले.

कुणाल
(वाट पाहते तुझी... दारातला हट्टी सडा अन रांगोळी
कसं समजावू त्यांना, आता वाट तुझी वेगळी... एकली)

Dedicated to my Aatya.