मी एकटा असताना
मी असून नसताना
असशील का तू
मला हसवण्यासाठी
विनाकारण हसशील का तू
वाटेल कधीतरी एकटं
तेव्हा धरायला हात
जिंकेन जग जेव्हा
थोपटायला पाठ
वाटेल फिरावं उगाच
रात्रीचं गाडीवरुन
येशील का एका फोनवर तेव्हा तू घरुन
वाटेल जेव्हा सारं संपल्यासारखं
नसेल कोणीच आजूबाजूला आपल्यासारखं
वाटेल जेव्हा नसावं कोणीच सोबत
बसावं अंधारलेल्या आभाळाकडे एकट्यानंच बघत
असशील का तू
माझ्यातली धुमसणारी शांतता समजून घ्यायला
येशील का तू तेव्हा मुक्यानंच साथ द्यायला
कधीतरी वाटेल असंही
वागावं वेड्यासारखं
कोणीही कशाचाच उगाच लावू नये अर्थ
असशील का तेव्हा खळखळून हसायला
आवडेल ना तुलाही कधी असं वेड्यासारखं वागायला
म्हणेन जेव्हा मी
सोड एकटं मला
घुटमळशील ना तिथे साथ माझी द्यायला
पाहीन तुझ्याकडे मग मी वैतागून
ठेवशील ना खांद्यावर हात न रहावून
अन जेव्हा तुला बोलवेन मी परत
येशील ना तू तेव्हाही खरंच
वाटेल जेव्हा बोलावं तिच्याबद्दल जरासं
खांद्यावर तुझ्या डोकं ठेवून रडावं जरासं
असशील ना तेव्हा मला मिठीत घ्यायला
वेडेपणा माझा असाच सहन करायला
कटींग चहा वडा पाव
लगोर्ची लपंडाव
तिला छेडताना
उंच उंच उडताना
शाळेच्या निरोपसमारंभात
कॉलेजच्या धांगडधिंग्यात
आयुष्याच्या रहाटगाडग्यात
असशील ना तू सुख दुःख
यशापयश शेअर करायला
"तू" फक्त "हो" म्हण..
अजून हवं काय जगायला!!
मैतरा तू फक्त मागून बघ
तुझ्यासाठीच आहे हा जीव
तुझ्यासाठी हसत ओलांडीन मी
मरणाचीही शीव...
तुझाच मैत्र
कुणाल प्रकाश रुद्राके
